وزگەنىڭ قايعىسى بولمايدى

دۇنيەدەگى ەڭ باقىتتى ادام –  تاعدىرىنا شۇكىرشىلىك ەتكەن ادام. حالقىمىز بۇدان قيىن كەزدەردى دە باستان كەشىرگەن. مۇراتى بيىك ۇلتىمىز قانداي قيىنشىلىقتار بولماسىن, ولاردىڭ ءبارىن ءبىر-بىرىنە ارقا سۇيەپ جەڭە بىلگەن. سول ارقىلى حالقىمىز ءبىرتۇتاس بەرىك ۇلت ەكەنىن وزگەلەرگە مويىنداتا بىلگەن.

قازاق ۇعىمىندا ء«تورت قۇبىلاڭ تەڭ بولسىن» دەگەن باتالى ءسوز بار. قۇبىلا – الەمنىڭ ءتورت اسپانى – باتىسى مەن  شىعىسى, وڭتۇستىگى مەن سولتۇستىگى.  ءبىزدىڭ وسى ءتورت قۇبىلامىزدىڭ بەرىك بولۋىندا حالقىمىزدىڭ كەز كەلگەن قيىندىققا شىدامدىلىق تانىتىپ, ۇيىمشىلدىقپەن شىعا ءبىلۋىن كورسەتەدى.

قازىر ءتۇرلى ۇيىمدار مەن قورلار, سونداي-اق جەكەلەگەن كومپانيالار تاسقىننان زارداپ شەككەن اعايىندارعا قولداۋ ءبىلدىرىپ جاتىر. وسى قاتاردان عىلىم ورتاسى مەن جەكەلەگەن وقۋ ورىندارى ۇجىمدارىن كورە الماي وتىرمىز. باسىنا ءىس تۇسكەندە ەگىلىپ-توگىلگەننەن گورى, جيىلىپ-تەرىلگەن ادام سىناقتان سىنباي وتەدى.

ءبىز, قانىش ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى, مەتاللۋرگيا جانە كەن بايىتۋ ينستيتۋتىنىڭ ۇجىمى زارداپ شەككەن ايماقتارعا ءبىر كۇندىك جالاقىمىزدى اۋدارۋعا ۇيعارىم جاساپ وتىرمىز. ەگەر ەلىمىزدىڭ عالىمدارى ءبىر كۇندىك جالاقىلارىن اۋدارسا, وراسان قارجى جينالار ەدى. بۇل اقشاعا ۇيلەرىنەن ايرىلىپ قالعان وتباسىلارعا جاڭا باسپانا سالىپ بەرۋگە بولار ەدى. جالقىنىڭ باقىتى – جالپىنىڭ باقىتىمەن جالعانعاندا عانا ءومىرىمىز باياندى بولماق. 

تىرشىلىكتىڭ تىنىسى جەلمەن كەلەدى, جەلمەن كەتەدى. امال دوستىڭ تورىنەن, ادال دوستىڭ بوساعاسى قادىرلى دەگەندە وسىنى ايتسا كەرەك. تاريح بىزگە تاعىلىم ءۇشىن قاجەت. نەسى بولعانىنان گورى, نەسى قالعانى ماڭىزدى. جاقسى تىلەۋ تىلەسەڭ, ىشىندە ءوزىڭ دە بارسىڭ, جامان تىلەۋ تىلەسەڭ, قورلىقتا قالعان جانسىڭ. ەلىمىزدىڭ بارلىق عالىمدارى مەن عىلىمي-زەرتتەۋ ينستيتۋتتارىن وسى باستاماعا قولداۋ بىلدىرلەرۋىن سۇرايمىن.

ب. كەنجاليەۆ,

مەتاللۋرگيا كەن بايىتۋ ينستيتۋتىنىڭ باس ديرەكتورى,

قر مەملەكەتتىك سىيلىعىنىڭ لاۋرەاتى,

تەحنيكا عىلىمىنىڭ دوكتورى, پروفەسسور